Сенбілік

Ұжымдық еңбектің дәстүрі
Қоғам игілігі үшін атқарылатын ұжымдық еңбектің көпжылдық дәстүрі кеңестік уақыттан бастау алады. Оның маңыздылығы бүгінде, климат өзгеруі мен экология мәселелері кең етек жайып жатқан кезде тереңдей түсті. Көктем мен күз кездерінде сенбіліктердің қажеттілігі жоғары. Қазіргі таңда, қоршаған ортаға, оның ахуалына қамқор адамдардың саны өсіп келеді. Біздің мектепте осы дәстүр жылда жалғасын табады.
Ағымдағы жылдың 30 наурыз күні Көкжайдақ аулынындағы Абай орта мектебінің барлық қызметкерлері көктемдегі экологиялық айлық аясында өткен сенбілігіне қатысты. Мектептің айналасын қар астында қалған қоқыстардан тазалауға, абаттандыру мен көгалдандыруға бағытталған сенбілік барысында барлық ұжым мүшелері белсенділік танытты. Кіші қызметкерлер мектеп айналасындағы теректердің түптерін әктеп, бірнеше ағаш түптерін отырғызды.
Менің ойымша, сенбілікке қатысудың жақсы жақтары көп екен. Өйткені, сенбілікте қатысқан барлық қызметкерлердің көңіл-күйі мен рухы көтеріліп, денесі ширап, бір-бірімен қалжыңдасып тарқады. Әрине, бұл іс-шара бір күнмен тоқталмайды, осы сәуір айында жалғасады, өйткені біздің мектептің ауласы үлкен. Алдығы уақытта «ұстаз-оқушы» болып бірлесе отырып, осы іс-шараны жалғастыруды жоспарлап отырмыз. Өйткені, ұстаздар үлгі ретінде, оқушылармен бірлесе отырып, сол қоқысты тазалап үлгі көрсетсе, ол да бір тәрбиенің түрі. Ондай әрекет оқушыны еңбекке үйретеді. Ал, еңбек қоғамның негізгі санаты, басым идеясы болуы керек.
Еңбектің адам санасы мен тәніне пайдасын ғылыми зерттеулер де дәлелдейді. Бұл өсиетті балаларға тек ұстаздар ғана емес қоғамның барлық азаматы ұйытқан абзал.

Салима Нусипова
Ақсу ауданы,
Көкжайдақ ауылы,
Абай атындағы орта
мектебінің директоры.